忽然之間，很想生bb。
明明之前自己的心態是希望永遠的二人世界，可以永遠自私地獨佔我家男人，等佢只係鍚我一個，寵我一個；還有很怕生bb 那種要把責任往身上扛一輩子的感覺，將要為他改變自己的生活方式、重心似是件很可怕、看不到盡頭的事。又怕生出黎既bb 唔靚、唔醒、唔聰明、唔健康、唔聽話、唔識教…友說是因為我未準備好，所以會有很多古怪的想法，到有一日我準備好的時候，所有從前的擔心都會煙消雲散，只會一心想著何時中獎。當時的我還擺出一副「睇下點~」的表情，原來心態真的會跟著時間和環境而改變的。
最近工作上似乎又去到樽頸位，唔上唔落的。同期的同事們走下一個，走下又一個，只有我仍然在大海中浮沉。有嘗試去找新工作，但又唔係非常積極逼自己一定要幾時幾時離開呢到，加上身邊的朋友開始生b，多了和新手媽媽同bb 接觸，覺得原來成件事不至於如洪水猛獸般可怕。
我知道自己還有一個潛藏在深處的想法：如果我有左bb，我就可以大條道理的繼續係呢間公司混飯吃，而不需要出去外面的世界…是的，我真的好無大志，既羨慕人家越跳越好，又沒勇氣跳出去，看著自己的不足就一直讓自己不足下去。你話呢個人，想點呢？！咪就係衰到想用生bb 呢個藉口繼續hea 落去囉！
既然係想生bb，我都好認真地對待這事。先與男人商量，看看他對此事的意見。他一直是想生的那一個，所以對於我的轉變他是非常支持的。再來就是好好的調理身體，睇中醫，食中藥，針灸等等，通通從前我不會做的我都做齊了。再之後就開始學習如何增加中獎機會，以為是自然不過的一件事，原來很多人扭盡六壬，唔得就係唔得…上Baby Kingdom 一睇，很多人方法用盡都是徒然，反而要放棄的時候就傳來好消息，令我領悟到幾個道理：
1) 有些東西，係你既就係你既，強求不得
2) 自己真是有夠無知，上一轉Baby Kingdom，你就會知道自己對於世界的知道有多狹隘…每上一次都長知識了
3) 以我的黑仔怪往績，及明白到世事不是努力追求就會有好結果的真理，都頗肯定天不會從我願的了，順其自然好了
4) 既然生仔要順其自然，就開始要計劃離開工作上的混水；再拖下去也不是辦法
5) 2014 的目標決定了 - 一係轉工，一係生仔
