well... 繼續努力

well... 尋日先講完可能有d 機，今日又day 1 喇！再次證明，有d 野係越想越無的…

不過唔緊要~ 我已經plan 好左今個cycle 要做d 乜！我隻智慧牙已經腫左成個幾兩個禮拜，趁而家可以照X-RAY 拿拿聲去睇下佢發生咩事先~ 仲想去飄眉同紋隱形眼線，以後化妝就可以慳番好多時間喇！

人生就是由surprise 堆砌出來的

跟據app 既記錄，今日應該會係day 1。不過今朝量體溫時仲係keep 住高位，而且睇番之前既體溫，今個月應該係早左排卵的，所以M 應該早2日已經要come，不過到今日都未見其蹤，係咪代理有d 機會呢？但係我仲未敢check 住呀…怕係今個月食左排卵藥同黃體藥，影響左個節奏。不過一方面係咁叫自己唔好期待，另一方面又正面地諗得太多，怕希望越大，失望越大又來襲…

尋晚訓覺既時候，男人忽然同我傾計，我以為佢係想同我做定心理輔導，萬一今個月又中空寶時唔好唔開心。點知佢講左個更大既題目，令我成晚輾轉反側…佢成功轉移左我既視線了。

考牌一take pass!

終於，我可以在我的To-do List 多打一個勾！

我今日考車牌pass 左！仲要係一take pass！

講番想學車既原因，其實單純想去旅行時可以同男人兩個輪流揸車，唔駛佢一個人揸哂咁辛苦~ 同埋呢排需要找一些其他重心去分散自己的注意力，所以學車係一個好選擇。

當初揀學棍波定自動波，基本上已毫不猶豫地選擇自動波，反正我只需要架車用來代步，而非用來享受駕駛的樂趣，而且我太了解自己，要在高度集中的情況下一心幾用，又俾油又吊極力子，手腳唔協調的我肯定會後悔…

坐言起行！馬上指派男人去運輸署替我拿表格報名，拿了本道路使用者回來。雖然裡面的內容全是中文，但是那些中文串連起來是會令人越睇越混亂，於是在我揭了10頁左右之後，毅然把那本東西丟到一旁，全力集中做mock 卷好了！(好有考A-Level 的感覺！)

筆試ok 後，排了不足3個月後考路試。收到日子時真的嚇了一嚇，比我還要早完成筆試的朋友要比我遲2個月才考路試，可能因為大家報考路試的地區不同吧… 但真心擔心自己唔夠時間學… 運輸署建議最少學30個鐘先去考路試，我數埋都係僅僅夠30個鐘…唯有馬上搵師傅盡快開始學！

革命嘗未成功

已經試了6個cycle，身體仍然丁點反應都無…

戎了凍飲，少食生冷野，做少少運動，學習同薑做好朋友，一切有益有利的東西，我都會去做，唯獨是中藥這一環，真的頂唔順。之前兩個月無睇錢太，去左睇浸大沈碧琼醫師，睇左佢之後我的體溫再提昇了，不過日日都要煲藥飲藥，真係搞到人都好似有d 抑鬱…恕小人無恆心又唔捱得，睇左2個月我放棄了…而家奉行除左量體溫同check 排卵之外，其他野咩都唔做 (但又不能自拔地戎飲凍野同唔食生冷野)。

好喇！尋日又day 1了…口講唔緊要，心仍然是戚戚然…到底是緣份未到，還是越想越無？定係身體其實有問題？結果一直話唔睇唔睇既西醫，放工都係一支箭咁衝左上去。原本想叫醫生開張醫生紙俾我去照輸卵管，但醫生說其實我試的時間尚短，不必急於一時做呢d 入侵性既檢查。又同我照超聲波，話我個子宮好靚，形狀大小都適中，無生瘤亦無古怪野。醫生再睇下我個體溫表，話我可能係黃體唔夠，於是開左一個cycle 排卵藥同黃體素俾我食。

聽完，反而釋懷了。心中不斷默念：有些事，不是你自己認為自己很努力，就一定會成功。
現在唯一可以做的，就是繼續等運到…

口裡說不，身體都要很誠實

今個cycle 唔成功…下個cycle 又要繼續努力！

其實人真係一種話變就變既動物，明明一年之前既我仲講緊想過永遠既二人世界，估唔到一件後既我居然會因為黎M 而感到失望…到底發生左d 咩事？我係咪俾外星人捉左上太空？

係等待既期間，明明口就叫自己放鬆，但d 行為卻一d 都唔放鬆…個身體有一丁點兒同平時唔同既生理反應就心中吶喊「YES！今次仲唔食糊？」爭在未當街跳起YEAH…又唔敢食生野凍野啦，又無去做淋巴按摩啦，日日係到數時間，係到揸住D test paper 左對右對d 線…其實，我唔鐘意咁樣既自己，覺得呢個完全都唔係我黎既，但係又控制唔到，成個人十級矛盾

我決定左，今日月真係要放鬆d！除左唔去睇錢太之外，其他野盡量照做照食！我會用test paper，會量體溫，會飲滴雞精當湯咁飲。所有野就等佢自然發生啦~

(口裡說不要太緊張，希望身體同心裡都一致地放鬆！)

===分隔線===

今日第一次去左見營養師，佢話我個體重其實係低過標準，不過下半身脂肪超標，同埋基礎代謝率好慢，要train 番好佢~ 其實好多佢講既野我都知道，不過成日都因為決心唔夠而半途而廢。今次我目標要做到營養師要求既standard，如果我連自己既惰性同周圍既誘惑都可以無視，仲有d 咩我係挑戰唔到呢？

(口裡說我要瘦，身體都一定要瘦呀唔該！)