尋晚訓覺既時候，男人忽然同我傾計，我以為佢係想同我做定心理輔導，萬一今個月又中空寶時唔好唔開心。點知佢講左個更大既題目，令我成晚輾轉反側…佢成功轉移左我既視線了。
呢個唔聲唔聲既男人，居然忽然間問我對移民有咩意見。移民呢個題目，通常都係我發牙痕既時候講，仲要係講完羨慕完人地就算；斷估唔到原來呢個人收收埋埋諗左咁多野。佢話如果真係移民的話，我會困難過佢，因為我所有野都係哂香港，移民等如要斫砍掉重練，所有野都要由頭適應過；而佢因為係加拿大生活過，理論上有過經驗，所以唔會太難適應。不過過到去搵工又係一個問題，先係搵工已經唔易，要再搵一份好似而家咁既office 工真係有如中六合彩一樣講彩數。而且女仔搵工係易過男仔，到時可能係我會搵到一份長工(先唔好理工種同人工)，而佢可能只可以做d 散工或者靠勞力捱既工作，問我頂唔頂得順。我覺得，如果已經去到果個地步，已經唔到你揀頂得順定頂唔順，而係一定要去頂。再黎既問題就係生活會好單一好悶，唔會好似而家咁咁多節目(雖然其實而家都無乜節目)，無外家可以番，無朋友可以一齊hea，最大既娛樂可能就係行supermarket 買定一個星期既餸…呢個，可能會係我唯一既concern，有起咩事上黎想搵個人呻下都無既滋味，諗下都覺得自己好可憐…不過都係果句，如果已經去到果個地步，都一定要去頂。
問題係，男人點解會有一個想移民既念頭？原來係怕同人比較，怕我會拎佢同人比較，怕d 親戚朋友拎佢同人比較，怕自己拎自己去同人比較…講真，我真係覺得佢已經好好，不論做人做事佢都已經做到200分，我地可能唔係最有錢果個，不過開心我地一定有份。但係原來佢又諗左咁多野我都唔知，我都要檢討下到底自己有幾了解佢…另外就係佢覺得車房果到已經睇唔到個前景，再做落去都唔會有得發圍，如果無得做ebay 的話，單靠車房果萬零蚊一定搵唔到食，反而去加拿大可能仲有機會搏下，所以驅使佢有移民既念頭。
其實如果真係有下一代的話，選擇移民都係一件好事黎既，只係而家既我未睇到到底成件事個impact 有幾大，我要用幾多時間去適應，到時個情況有幾差，個感覺有d 不安。不過，無論佢決定要點做，要去邊到，我都一定會支持佢。
最緊要都係我地2個人一齊je！
沒有留言:
張貼留言