考牌一take pass!

終於，我可以在我的To-do List 多打一個勾！

我今日考車牌pass 左！仲要係一take pass！

講番想學車既原因，其實單純想去旅行時可以同男人兩個輪流揸車，唔駛佢一個人揸哂咁辛苦~ 同埋呢排需要找一些其他重心去分散自己的注意力，所以學車係一個好選擇。

當初揀學棍波定自動波，基本上已毫不猶豫地選擇自動波，反正我只需要架車用來代步，而非用來享受駕駛的樂趣，而且我太了解自己，要在高度集中的情況下一心幾用，又俾油又吊極力子，手腳唔協調的我肯定會後悔…

坐言起行！馬上指派男人去運輸署替我拿表格報名，拿了本道路使用者回來。雖然裡面的內容全是中文，但是那些中文串連起來是會令人越睇越混亂，於是在我揭了10頁左右之後，毅然把那本東西丟到一旁，全力集中做mock 卷好了！(好有考A-Level 的感覺！)

筆試ok 後，排了不足3個月後考路試。收到日子時真的嚇了一嚇，比我還要早完成筆試的朋友要比我遲2個月才考路試，可能因為大家報考路試的地區不同吧… 但真心擔心自己唔夠時間學… 運輸署建議最少學30個鐘先去考路試，我數埋都係僅僅夠30個鐘…唯有馬上搵師傅盡快開始學！



 師傅是男人鋪頭前老闆介紹的，第一堂係筲簊灣上車，講左5分鐘左右已經叫我試下揸。可能坐得男人車多，大概會知道點控制，除左未拿捏到轉灣位置、扭軚要扭幾多之外同埋架車行得唔夠直之外，基本上無咩問題。不過有一個最大既問題就係一出現一個錯誤，其他明明平時唔會犯既錯誤都通通輪流出現，一錯就越驚，一驚就越錯，一錯師傅就越鬧，越鬧又越驚，惡性循環不斷出現…

為左令自己定d，我將調頭、三手泊位同跑馬地路試的三條路線全部step by step寫哂出黎，再將特別要注意既地方同陷井位全部mark低，無得學車時不斷咁將調頭、泊位同路線係個腦到不斷run，又不斷係youtube 睇試場既模擬考試片段，再上堂時既信心真係會大d！不過臨考之前果堂男人上左車睇我學車，都唔知係緊張定點，明明前兩堂揸得好好地，今日都亂哂龍…即刻咩信心都無哂…

講番今日考試，考試時間4點，我2:30 就已經約左師傅，先上天后廟道練習調頭同泊位，再揸入跑馬地行多幾次路試。事前師傅已經預測我協藍塘道既機會比較大，所以集中練習呢條路線。練習時仍然有好多瘕瘕同大意位，不過師傅話如果考時可以有番呢個水准而又有少少運仔 (無車同人忽然標出黎，無太多死車，的士小巴無恰我等等)，都好大機會可以及格。3:45pm揸到去藍塘園，去完洗手間，師傅忽然大叫：aiya！原來你係考4點唔係4點3呀！(其實我老早已經提佢我係考4點，佢平時都無搞曾係4點3，唔知點解忽然佢會覺得我係考4點3…) 於是馬上揸番架車上試場。一出大路，師傅忽然見到一架「駕駛考試」既車上緊黎，仲大叫：呢個考牌官係香港70幾個考牌官最好人架！如果佢考你你想唔pass 都幾難喇！上到去試場門口，師傅就立即同在場d 姐姐攞料，一知道最好人考牌官係下一個available 既考牌官之後，馬上塞哂d 文件係我手推我落車去登記…基本上我上一秒仲練習中，下一秒已經要去考試，完全連驚既時間都無…

入到去登記，工作人員叫我拎兩塊 「駕駛考試」既牌裝上車，出到去已經見到師傅幫我擺好架車，然後考牌官就上車喇。原本諗住臨考之前定一定心神係腦海中run 一次所有steps 同路線，因為拿拿淋上左車既關係唯有頂硬上。考牌官個人好好人好有禮貌，而我都跟住forum 既前人教路，盡力表現的有禮貌同淡定(雖然聽得出自己把聲都震埋)。考牌官講解左一次我要做d 咩，叫我先做掉頭，同埋提我前面既虛線係路駁既延續，唔好摌左上去。從來未係呢個位都做過泊位同調頭動作，加上平時d 位都唔係預得好，俾考牌官提完唔好摌上去其實都有d 淆底，不過又神奇地做得唔錯喎！做完就做三手泊位，做做下有一下亂左，未打燈就想倒後，又唔記得鬆手制，嚇到我要即刻停一停定一定神再同考牌官say sorry…考牌官真係好好人，佢叫我唔好咁緊張，慢慢諗清楚要做咩先開始，唔駛急！佢講完之後我個人就定左落黎，由頭再黎過~ 泊位最後順利完成！

泊完位，記住師傅講要偷d 左邊既位先上橋。呢個位從來無練過，d位又唔知點預，之前仲睇過有人因為上橋呢個位fail 左，所以一直最擔心呢個位…點知又俾我順利上到橋！做斜路起步架車有少少溜後，雖然唔太嚴重，不過個心都沉一沉…

正式出車，有個姐姐會幫手係馬會迴旋處俾signal，不過都唔可以旨意哂佢地，因為好似我出車既時候，佢揮手叫我行，其實佢後面有架貨車衝緊落黎，好彩我自己有望一望。沿住荷塘道一直落，過哂d 死車之後，考牌官就指示我轉右行藍塘道路線~ yeah 真係俾師傅貼中左！呢個時候我見到左手邊有個好熟悉既背影，雖然佢架電單車同頭盔都唔同左樣，不過一認就認到佢件衫啦！明明叫左佢唔好過黎，我怕一見到佢又緊張，點知佢都係過左黎支持我(定睇下我點fail 呢?!)，果下好想笑出黎~ 去到路口好遲先記得打燈，都係怪自己分左心…拿拿聲打番之後等到完全無車先出，左轉上藍塘道果到無咩問題，全程落去都好順暢，無咩車同人。差不多去到載德街街口，好記得尋晚男人同我兜左好多次，提我邊個位要開始慢，邊到開始要打燈cut 埋左邊線，全部都做得番出黎。之前去到巴士站斑馬線，有個好好心既巴士司機揮手叫我行，我又好蠢咁真係聽佢講，去到斑馬線停左一停無望真就繼續行…呢個時候考牌官同我講：「其實呢，頭先你唔應該信個司機，應該自己停一停望清楚，佢雖然係好心，不過佢都可能睇唔到佢後面有人過馬路架嘛！唔好俾人影響到呀~」個心再沉一沉…都打定輸數了…

 沿留成和道上去去又見到男人，原來佢仲帶左口罩tim！又想笑出黎喇~ 轉番入冬青道，再停番係試場門口，拉手制，入P波，不過唔記得熄power…到考牌官提我先識得熄…果然係學車時無做過既野就唔記得做…事前我都已經好擔心咁問左師傅一次成個考試完成既動作，到最後都係臨尾香…

考完拎番兩個 「駕駛考試」牌入去office，工作人員叫我坐一坐先等攞成績，我仲一路等一路睇我面前果張講解點排快期重考步驟既poster。等左一陣，工作人員就叩我個名，仲同我講「恭喜你~」我都唔係好信，咁都俾我碌到個牌番黎？！直至我收到成績單，見到乙部試同丙部試兩格都劃左係「合格」，我先識得叫出黎！好開心攞番齊所有野出去，師傅已經係架廾上面等緊我~ 佢見到我揸住張快期重考leaflet，以為我衰左，係咁睇我到底邊項俾人剔左，過左一陣先睇到我係pass 既~ 係咁大叫「你嚇死我喇！」！之後師傅叫我俾100蚊俾d 姐姐飲茶，我又俾左封150蚊利是俾師傅~ 原本師傅想車埋我出銅鑼灣，點知行到路後就見到男人係到等緊我！佢好得戚咁話我考到個牌50%係好彩，70%係因為佢…仲問我佢易哂容點解我都認得佢…

Anyway~ 心願達成！下一步可以學電單車lu~